Tag Archives: Khushbir Singh Shaad

Ye jo ghamgeen hokar tujh ko rota dekhtey haiN

Ye jo ghamgeen hokar tujh ko rota dekhtey haiN
YaqeeN kar sab tirey gham ka tamaasha dekhtey haiN

Wahi samjheiNgey kitni aarzi hai ye bulandi
jo Suraj ko nasheboN meiN utarta dekhtey haiN

Ye kaisi be-basi hai ,AabgeenoN ko bana kar
Hawa kay haath phir un ko shikasta dekhtey haiN

Ye Sehra kab talak hassas reh saktey haiN aakhir?
Ke din bhar ik na ik pyasey ko marta dekhtey haiN

Kabhi munkir bhi ho jatey haiN hum is Aaieney kay
Kabhi be-chaargi se apna chehra dekhtey haiN

JawaaN hotey huye dekha tha in aankhoN mein jin ko
unhiN khwaboN ko ab aankhoN meiN marta dekhtey haiN

Kisi makhsoos manzil ka taAqub kartey kartey
Achanak khud ko hum be-samt hota dekhtey haiN

By Khushbir Singh Shaad

facebooktwittergoogle_plusredditpinterestlinkedinmailby feather

Miri talab ko wahaN be-hayaai samjha gaya

Miri talab ko wahaN be-hayaai samjha gaya
Jo haq bhi maanga to us ko gadaai samjha gaya

Bayaan talkh tha mera zara magar sach tha
mirey bayaan ko shola-nawaai samjha gaya

Ab aur kitna nibhaata mein us taAluq ko?
ke ibteda meiN jisey intehaai samjha gaya

Bas is liye ke mein lafzoN se door rehta hooN
Mira sukoot miri be-nawaai samjha gaya

Yahi to asl khasaara tha khush-libaasi ka
Jo muntashir tha, usey bhi ikaai samjha gaya

Us ik gumaan ne kya kya yaqeeN ko dhokey diye
KE rasm o raah ko bhi aashnaai samjha gaya

By Khushbir Singh Shaad

facebooktwittergoogle_plusredditpinterestlinkedinmailby feather

Chala gaya wo yaqeeN ko mirey gumaaN kar kay

Chala gaya wo yaqeeN ko mirey gumaaN kar kay
Ghalat kiya hai bahut us ko raazdaaN kar kay

Ye sochta hooN mohabbat ne kya diya mujh ko?
Ab eik umr mohabbat meiN raaigaaN kar kay

Mein chaahta tha na phailey mazeed aag us ki
Bujha magar wo miri zaat meiN dhuaaN kar kay

YahiN pe khatm kareiN is ko, faaida kya hai
Taveel aur taAluq ki daastaaN kar kay?

Bahut haseeN haiN ye tanhaaiaN magar in ko
abhi kuchh aur saNwaaruN udasiaaN kar kay

Wo chaahta hai ke saalim bhi mein dikhaai dooN
mirey wajood ki be-tarah dhajjiaaN kar kay

Kaha ye dard ne mujh se’nazar mila to sahi’
tu Shaad ho to gaya zakhm ko nishaaN kar kay

By Khusbir Singh Shaad

facebooktwittergoogle_plusredditpinterestlinkedinmailby feather