Tag Archives: Daag Dehlvi

Ab vo ye kah rahe hain mirii maan jaa.iye

ab vo ye kah rahe hain mirii maan jaa.iye
allah terii shaan ke qurbaan jaa.iye

big.De hu.e mizaaj ko pahchaan jaa.iye
siidhii tarah na aaniyegaa maan jaa.iye

kis ka hai KHauf rokne vaalaa hi kaun hai
har roz kyuun na jaa.iye mehmaan jaa.iye

mahfil mein kis ne aap ko dil men chhupaa liyaa
itnon men kaun chor hai pahchaan jaa.iye

hain tevarii men bal to nigaahen phirii hu.ii
jaate hain aaisse aane se ausaan jaa.iye

do mushkilen hain ek jataane men shauq ke
pahle to jaan jaa.iye phir maan jaa.iye

insaan ko hai KHaana-e-hastii men lutf kyaa
mehmaan aa.i.e to pashemaan jaa.iye

go vaada-e-visaal ho jhuuTaa maza to hai
kyuun kar na aaise jhuuT ke qurbaan jaa.iye

rah jaa.e ba.ad vasl bhii cheTak lagii hu.ii
kuchh rakhiye kuchh nikaal ke armaan jaa.iye

achchhii kahii ki ghair ke ghar tak zara chalo
main aap kaa nahiin huun nigahbaan jaa.iye

aa.e hain aap ghair ke ghar se kha.De kha.De
ye aur ko jataa.iye ehsaan, jaa.iye

donon se imtihaan-e-vafaa par ye kah diyaa
manvaa.iye raqiib ko yaa maan jaa.iye

kyaa bad-gumaaniyaan hain unhen mujh ko hukm hai
ghar men KHudaa ke bhii to na mehmaan jaa.iye

kyaa farz hai ki sab mirii baaten qubuul hain
sun sun ke kucch na maaniye kuch maan jaa.iye

saudaa.iyaan-e-zulf men kuchh to laTak bhii ho
jannat men jaa.iye to pareshaan jaa.iye

dil ko jo dekh lo to yahii pyaar se kaho
qurbaan jaa.iye tire qurbaan jaa.iye

jaane na duungaa aap ko be-faisla hu.e
dil ke muqaddame ko abhii chhaan jaa.iye

ye to bajaa ki aap ko duniyaa se kyaa gharaz
jaatii hai jis kii jaan use jaan jaa.iye

ghusse men haath se ye nishaanii na gir pa.De
daaman men le ke meraa garebaan jaa.iye

ye muKHtasar javaab milaa arz-e-vasl par
dil maantaa nahiin ki tirii maan jaa.iye

vo aazmuuda-kaar to hai gar valii nahiin
jo kuchh bataa.iye ‘daagh use maan jaa.iye

By Daag Dehlvi

facebooktwittergoogle_plusredditpinterestlinkedinmailby feather

Aarzuu hai vafaa kare ko.ii

Aarzuu hai vafaa kare ko.ii
jii na chaahe to kyaa kare ko.ii

gar maraz ho davaa kare ko.ii
marne vaale ka kyaa kare ko.ii

koste hain jale hu.e kyaa kyaa
apne haq men du.aa kare ko.ii

un se sab apnii apnii kahte hain
meraa matlab adaa kare ko.ii

chaah se aap ko to nafrat hai
mujh ko chaahe KHudaa kare ko.ii

is gile ko gila nahiin kahte
gar maze kaa gilaa kare ko.ii

tum saraapaa ho suurat-e-tasviir
tum se phir baat kyaa kare ko.ii

kahte hain ham nahiin KHudda-e-kariim
kyuun hamaarii KHataa kare ko.ii

jis men laakhon baras kii huuren hon
aissi jannat ko kyaa kare ko.ii

is jafaa par tumhen tamannaa hai
ki mirii iltijaa kare ko.ii

munh lagaate hi ‘daagh’ itraayaa
lutf hai phir jafaa kare ko.ii

By Daag Dehlvi

facebooktwittergoogle_plusredditpinterestlinkedinmailby feather

Dil de to is mijaaz ka

dil

Dil de to is mijaaz ka parvardigaar de
Jo ranj kii ghadii bhi khushi se guzaar de

By Daag Dehlvi

facebooktwittergoogle_plusredditpinterestlinkedinmailby feather