Category Archives: Zindagi

Bahut roya woh hum ko yaad kar ke

Bahut roya woh hum ko yaad kar ke
Hamaari zindagii barbaad kar ke

PalaT kar phir yahiN aajayeNge hum
Woh dekhe to hamaiN aazaad karke

Rihaayii ki koi soorat nahii hai
Magar haaN! minnat E saiyaad kar ke

Badan mera chhuaa tha usne lekin
Gaya hai rooh ko aabaad kar ke

Har aamir tool dena chaahta hai
Muqarrar zulm ki mee’aad kar ke

By Parveen Shakir

facebooktwittergoogle_plusredditpinterestlinkedinmailby feather

Uth aur phir se rawanaa ho dar zeyaadaa nahiN

Uth aur phir se rawanaa ho dar zeyaadaa nahiN
Bahut kathin sahi manzil safar zeyaadaa nahiN

ByaaN me apne sadaaQat ki hai kami warnaa
Ye raaz kya hia K us par asar zeyaadaa nahiN

Mujhe kharab kiya usne haaN kiya hoga
Usi se poochhiye mujh ko khabar zeyaadaa nahiN

Suna hai wo mere baare me sochta hai bahut
Khabar to hai hi magar mo’tabar zeyaadaa nahiN

Yeh justaju to rahe kaun hai wo kaisa hai
SuraaGh kuchh to milega agar zeyaadaa nahiN

Abhi rawana huN yeksuyi se maiN dasht ba dasht
K rahguzaar E safar meN shajar zeyaadaa nahiN

Jabhi to khaar E dil E dostaaN nahiN huN abhi
K aib mujh meN bahut haiN hunar zeyaadaa nahiN

DinoN ki baat hai ab kiimiyaa gari apni
K rah gayi hai zara si kasar zeyaadaa nahiN

‘Zafar’ hum aapko gumraah to nahiN kahte
Yahi K haiN bhi agar raah par zeyaadaa nahiN

By Zafar Iqbal

facebooktwittergoogle_plusredditpinterestlinkedinmailby feather

Phir is duniyaa se ummiid-e-vafaa hai

phir is duniyaa se ummiid-e-vafaa hai
tujhe ai zindagii kyaa ho gayaa hai

ba.Dii zaalim nihaayat bevafaa hai
ye duniyaa phir bhii kitnii KHushnumaa hai

ko.ii dekhe to bazm-e-zindagi men
ujaalon ne andheraa kar diyaa hai

KHudaa se log bhi KHaa.if kabhii the
magar logon se ab KHaa.if KHudaa hai

(KHaa.if: afraid / frightened)

maze puuchho kuchh us se zindagii ke
havaadis men jise jiinaa pa.Daa hai

(havaadis: disasters)

mere pahluu men dil hai to yaqiinan
azal hii se magar TuuTaa hu.aa hai

(azal: beginning)

zabaan-o-fan se main vaaqif nahiin huun
magar vijdaan meraa rahnumaa hai

(vijdaan: ecstasy / euphoria)

mere naqqaad merii shaa.irii to
mere TuuTe hu.e dil kii sadaa hai

kahaan huun ‘shaad’ main to shaad saa huun
vo shaad-e-KHush-navaa to mar chukaa hai

(shaad: happy / glad / cheerful)

By Naresh Kumar Shaad

facebooktwittergoogle_plusredditpinterestlinkedinmailby feather

Din ko rahte jhiil par dariyaa kinaare raat ko

din ko rahte jhiil par dariyaa kinaare raat ko
yaad rakhnaa chaand taaro is hamaarii baat ko

ab kahaan vo mahfilen hain ab kahaan vo ham-nashiin
ab kahaan se laa.en un guzre hu.e lamhaat ko

pa.D chukii hai utnii girhen kuchh samajh aataa nahiin
kaise suljhaa.en bhala uljhe hu.e haalaat ko

kitni tuufaanii thiin raaten jin mein do diivane dil
thapkiyaan dete rahe bha.Dke hu.e jazbaat ko

dard men Duubii hu.ii lai ban ga.ii hai zindagii
bhuul jaate kaash ham ulfat-bhare naghmaat ko

vo ki apne pyaar kii thii bhiigii bhiigii ibtidaa
yaad kar ke ro diyaa dil aaj us barsaat ko

By Ahmad Rahi

facebooktwittergoogle_plusredditpinterestlinkedinmailby feather

Dil ke sunsaan jaziiron kii KHabar laa.egaa

dil ke sunsaan jaziiron kii KHabar laa.egaa
dard pahluu se judaa ho ke kahaan jaa.egaa

kaun hotaa hai kisii kaa shab-e-tanhaa.ii men
gham-e-furqat hii gham-e-ishq ko bahalaa.egaa

chaand ke pahluu men dam saadh ke rotii hai kiran
aaj taaron kaa fusuun KHaak nazar aa.egaa

raag men aag dabii hai gham-e-mahruumiii kii
raakh hokar bhii ye shola hamen sulgaa.egaa

vakt KHamosh hai ruuThe hu.e yaaron kii tarah
kaun lau dete hu.e. zaKHmaon ko sahlaa.egaa

zindagii chal ki zaraa maut ke dam-KHam dekhen
varna ye jazba lahad tak hamen le jaa.egaa

By Ahmad Rahi

facebooktwittergoogle_plusredditpinterestlinkedinmailby feather

Ai dil vo aashiqii ke fasaane kidhar ga.e

ai dil vo aashiqii ke fasaane kidhar ga.e
vo umr kyaa hu.ii vo zamaane kidhar ga.e

viiraan hain sehn o baagh bahaaron ko kyaa hu.aa
vo bulbulen kahaan vo taraane kidhar ga.e

hai najd men sukuut havaa.on ko kyaa hu.aa
lailaa.en hain KHamosh divaane kidhar ga.e

uj.De pa.De hain dasht ghazaalon pe kyaa banii
suune hain kohsaar divaane kidhar ga.e

vo hijr men visaal kii ummiid kyaa hu.ii
vo ranj mein KHushii ke bahaane kidhar ga.e

din raat mai-kade men guzartii thii zindagii
‘akhtar’ vo be-KHudii ke zamaane kidhar ga.e

By Akhtar Shirani

facebooktwittergoogle_plusredditpinterestlinkedinmailby feather

Ab vo ye kah rahe hain mirii maan jaa.iye

ab vo ye kah rahe hain mirii maan jaa.iye
allah terii shaan ke qurbaan jaa.iye

big.De hu.e mizaaj ko pahchaan jaa.iye
siidhii tarah na aaniyegaa maan jaa.iye

kis ka hai KHauf rokne vaalaa hi kaun hai
har roz kyuun na jaa.iye mehmaan jaa.iye

mahfil mein kis ne aap ko dil men chhupaa liyaa
itnon men kaun chor hai pahchaan jaa.iye

hain tevarii men bal to nigaahen phirii hu.ii
jaate hain aaisse aane se ausaan jaa.iye

do mushkilen hain ek jataane men shauq ke
pahle to jaan jaa.iye phir maan jaa.iye

insaan ko hai KHaana-e-hastii men lutf kyaa
mehmaan aa.i.e to pashemaan jaa.iye

go vaada-e-visaal ho jhuuTaa maza to hai
kyuun kar na aaise jhuuT ke qurbaan jaa.iye

rah jaa.e ba.ad vasl bhii cheTak lagii hu.ii
kuchh rakhiye kuchh nikaal ke armaan jaa.iye

achchhii kahii ki ghair ke ghar tak zara chalo
main aap kaa nahiin huun nigahbaan jaa.iye

aa.e hain aap ghair ke ghar se kha.De kha.De
ye aur ko jataa.iye ehsaan, jaa.iye

donon se imtihaan-e-vafaa par ye kah diyaa
manvaa.iye raqiib ko yaa maan jaa.iye

kyaa bad-gumaaniyaan hain unhen mujh ko hukm hai
ghar men KHudaa ke bhii to na mehmaan jaa.iye

kyaa farz hai ki sab mirii baaten qubuul hain
sun sun ke kucch na maaniye kuch maan jaa.iye

saudaa.iyaan-e-zulf men kuchh to laTak bhii ho
jannat men jaa.iye to pareshaan jaa.iye

dil ko jo dekh lo to yahii pyaar se kaho
qurbaan jaa.iye tire qurbaan jaa.iye

jaane na duungaa aap ko be-faisla hu.e
dil ke muqaddame ko abhii chhaan jaa.iye

ye to bajaa ki aap ko duniyaa se kyaa gharaz
jaatii hai jis kii jaan use jaan jaa.iye

ghusse men haath se ye nishaanii na gir pa.De
daaman men le ke meraa garebaan jaa.iye

ye muKHtasar javaab milaa arz-e-vasl par
dil maantaa nahiin ki tirii maan jaa.iye

vo aazmuuda-kaar to hai gar valii nahiin
jo kuchh bataa.iye ‘daagh use maan jaa.iye

By Daag Dehlvi

facebooktwittergoogle_plusredditpinterestlinkedinmailby feather

Dost

Dost zindagi ki wo cheez hain
jo sbse haseen hai..

Dost na hote to ky khushi ky gum
ky tum or ky hum…

Dost bin zindagi ky hoti
ye har pal tanha hi rehti…

Kisse krte hum baatein do chaar
agr zndgi me na hote dost yaar…

Musibaton mein saath nibhate hain
fir khushiyan hanskar manate hain..

Ladai jhagde to hote hi rehte hain
pr sacche dost sb kch sehte hain
Chah kar bhi wo rooth nahi paate
jaakr durr or paas wo aate….

DOst na hote to dosti kon nibhata
Dosti ka asli matlb kon batata…

By Vaibhav Srivastava

facebooktwittergoogle_plusredditpinterestlinkedinmailby feather

Dil ke dariyaa ko kisii roz utar jaanaa hai

dil ke dariyaa ko kisii roz utar jaanaa hai
itanaa besimt na chal lauT ke ghar jaanaa hai

us tak aatii hai to har chiiz Thahar jaatii hai
jaise paanaa hii use asl me.n mar jaanaa hai

bol ai shaam-e-safar rang-e-rihaa_ii kyaa hai
dil ko rukanaa hai ki taaro.n me.n Thahar jaanaa hai

kaun ubharate hue mahataab kaa rastaa roke
us ko har taur suu-e-dasht-e-sahar jaanaa hai

mai.n khilaa huu.N to isii Khaak me.n milanaa hai mujhe
vo to Khushbuu hai use agale nagar jaanaa hai

vo tere husn kaa jaaduu ho ke meraa Gam-e-dil
har musaafir ko isii ghaaT utar jaanaa hai

By Amjad Islam Amjad

facebooktwittergoogle_plusredditpinterestlinkedinmailby feather

Bachpan Ke Din

Bachpan ke din ab kabhi nahi ayenge
Bachpan ki wo baatein hansti khelti din or raatein ab kbhi nhi aayenge…

Jo chaiye hota tha wo maangne se pehle hi mil jata tha
rone se pehle koi hansa jata tha…

Log dekhna chahte the hamari sharartein khush hote the,
sunkar hamare mukh se pyari pyari totli baatien…

Kisi cheez ka gum nahi tha,
kuki tab hamare soch me itna dum nahi tha….

Wo bachpan ke din abhi bhi bohot yaad aate hain
Par iss samay ke samandar ki gehraai mein wo doob jaate hain
fir mann ki gehraai mein wo pal sama jate hain….

Naa thi tab kisi ko paane ki chinta,
naa tha tab kisi ko khone ka darr
naa jaane ku door hogya humse hamara pyara sa bachpann….

Bachpann mein hamare lie din or raat ek tha
kuki tab hamare paas samay anek tha…

Ab kabi nhi ayega wo pal
naa hi aaj or na kal,
ab soona sa lagta hai wo ghar ka aangan
jahan bitaya humne apna pyaara sa bachpan…

Zindgi ne to hume bht kuch dia
fir bhi naa jaane ku humse hamare bachpann ka din cheen lia…

Sacchaai to yehi hai
ki bachpan ke din ab kabhi nahi ayenge
wo beeta hua bachpann sirf yaadein hi bankar reh jayenge…

Aaj bhi sochta hoon ki wo pal wapis aajaye
mera beeta hua kal waapis aajaye…..

Bachpan ke din kitne suhaane hote the
har pal khush rehne ke bahaane hote the….

Kyon bacpann humse ab duur hogya
ku wo lamha itna majboor hogya…

Waise to abhi puri zndgi baaki hai
par bachpan ab kabhi laut kar nahi ayega
iss baat ki bhi udaasi hai..

Bacpan ke din bhi kitne haseen hote the
hum sab apne aap mein hi leen hote the…

Bacpan ke wo din yaad aate hain
har pal hume satate hain,
karte rehte the mauj masti har dum
kya batayein kitna pyara tha hamara bachpann

Sab kuch to hai paas,
bs uss bachpan ke dino ki hai aas…..

By  Vaibhav Srivastava

facebooktwittergoogle_plusredditpinterestlinkedinmailby feather