Category Archives: Nasha

Ai dil vo aashiqii ke fasaane kidhar ga.e

ai dil vo aashiqii ke fasaane kidhar ga.e
vo umr kyaa hu.ii vo zamaane kidhar ga.e

viiraan hain sehn o baagh bahaaron ko kyaa hu.aa
vo bulbulen kahaan vo taraane kidhar ga.e

hai najd men sukuut havaa.on ko kyaa hu.aa
lailaa.en hain KHamosh divaane kidhar ga.e

uj.De pa.De hain dasht ghazaalon pe kyaa banii
suune hain kohsaar divaane kidhar ga.e

vo hijr men visaal kii ummiid kyaa hu.ii
vo ranj mein KHushii ke bahaane kidhar ga.e

din raat mai-kade men guzartii thii zindagii
‘akhtar’ vo be-KHudii ke zamaane kidhar ga.e

By Akhtar Shirani

facebooktwittergoogle_plusredditpinterestlinkedinmailby feather

Ishq me.n laajavaab hai.n ham log

ishq me.n laajavaab hai.n ham log
maahataab aafataab hai.n ham log

[laajavaab=without an equal]
[maahataab=moon; aafataab=sun]

garche ahal-e-sharaab hai.n ham log
ye na samajho Kharaab hai.n ham log

[garche=even though]
[ahal-e-sharaab=residents of wine (drinkers)]

shaam se aa gaye jo piine par
subah tak aafataab hai.n ham log

naaz karatii hai Khaanaa-viiraanii
aise Khaanaa-Kharaab hai.n ham log

[Khaanaa-viiraanii=ruination]
[Khaanaa-Kharaab=wretched]

tuu hamaaraa javaab hai tanahaa
aur teraa javaab hai.n ham log

[tanahaa=by oneself]

Khuub ham jaanate hai.n qadr apanii
kitane naakaamayaab hai.n ham log

[qadr=worth; naakaamayaab=not successful]

har haqiiqat se jo guzar jaaye.N
vo sadaaqat-m’aab hai.n ham log

[sadaaqat-m’aab=extremely truthful and pious person]

jab milii aa.Nkh hosh kho baiThe
kitane haazir-javaab hai.n ham log

[haazir-javaab=witty; good at repartee]

By Jigar Moradabadi

facebooktwittergoogle_plusredditpinterestlinkedinmailby feather