Category Archives: Gham

Shab wohi lekin sitara aur hai

Shab wohi lekin sitara aur hai
Ab safar ka isteā€™ara aur hai

Ek muththi rait men kaise thame
Is samandar ka kinara aur hai

Mauj k murne men kitni der hai
Nao dali aur dhara aur hai

Jang ka hathyar tai kuch aur tha
Teer seene men utara aur hai

Matn men to jurm sabit hai magar
Haashiya, sare ka sara aur hai

Sath to mera zamiN deti mager
Aasman ka hi ishara aur hai

Dhoop men dewaar hi kaam ayegi
Tez barish ka sahara aur hai

Haarne men ek anaa ki baat thi
Jeet jane men khasara aur hai

Sukh ke mausam ungliyoN pe gin liye
Fasl E gham ka goshwara aur hai

Der se palkeN nahi jhapkiN meri
Pesh E jaN abke nazara aur hai

Aur kuch pal us ka rasta dekh lun
Aasman par ek tara aur hai

Had chiraghon ki yahan se khatm hai
Aaj se rasta hamara aur hai

By Parveen Shakir

facebooktwittergoogle_plusredditpinterestlinkedinmailby feather

Aag kaa rishtaa nikal aa.e ko.ii paanii ke saath

aag kaa rishtaa nikal aa.e ko.ii paanii ke saath
zinda rah saktaa huun aisii hii KHush-imkaanii ke saath

tum hii batlaa.o ki us kii qadr kyaa hogii tumhen
jo mohabbat muft men mil jaa.e aasaanii ke saath

baat hai kucch zinda rah jaana bhii apnaa aaj tak
lahar thii aasuudgii kii bhii pareshaanii ke saath

chal rahaa hai kaam saaraa KHuub mil-jul kar yahaan
kufr bhii chimTaa hu.aa hai jazb-e-iimaanii ke saath

farq pa.Dtaa hai ko.ii logon men rahne se zaruur
shahr ke aadaab the apnii bayaabaani ke saath

ye vo duniyaa hai ki jis kaa kuchh Thikaana hii nahiin
ham guzaara kar rahe hain dushman-e-jaanii ke saath

raa.egaanii se zaraa aage nikal aa.e hain ham
is dafa to kuchh giraanii bhii hai arzaani ke saath

apnii marzii se bhi ham ne kaam kar Daale hain kuchh
lafz ko la.Dvaa diyaa hai besh-tar ma.anii ke saath

faaslon hii faaslon men jaan se haaraa ‘zafar’
ishq thaa laahoriye ko ek multaanii ke saath

By Zafar Iqbal

facebooktwittergoogle_plusredditpinterestlinkedinmailby feather

Asar us ko zaraa nahiin hotaa

asar us ko zaraa nahiin hotaa
ranj raahat-fazaa nahiin hotaa

bevafaa kahne kii shikaayat hai
to bhii vaada-vafaa nahiin hotaa

zikr-e-aghyaar se hu.aa maaluum
harf-e-naaseh buraa nahiin hotaa

(zikr-e-aghyaar: description of strangers)
(harf-e-naaseh: word of preacher)

kis ko hai zauq-e-talKH-kaami lek
jang bin kuchh mazaa nahiin hotaa

(zauq-e-talKH-kaami: ability to enjoy bitterness)
(lek: but / nevertheless)

tum hamaare kisii tarah na hu.e
varna duniyaa men kyaa nahiin hotaa

us ne kyaa jaane kyaa kiyaa le kar
dil kisii kaam kaa nahiin hotaa

imtihaan kijiye meraa jab tak
shauq zor-aazmaa nahiin hotaa

(zor-aazma: making efforts, to try)

ek dushman ki charKH hai na rahe
tujh se ye ai du.aa nahiin hotaa

(charKH: a wheel)

aah tuul-e-amal hai roz-fuzuun
garche ik mudda.aa nahiin hotaa

(tuul-e-amal: longitude of desire)
(roz-fuzuun: numerous days)

tum mere paas hote ho goyaa
jab ko.ii duusraa nahiin hotaa

haal-e-dil yaar ko likkhuun kyuunkar
haath dil se judaa nahiin hotaa

rahm bar-KHasm-e-jaan-e-ghair na ho
sab kaa dil ek saa nahiin hotaa

(bar-KHasm-e-jaan-e-ghair: on life of others antagonists)

daaman us kaa jo hai daraaz to ho
dast-e-aashiq rasaa nahiin hotaa

(dast-e-aashiq: and of lover)
(rasaa: reached / delivered)

chaara-e-dil sivaa.e sabr nahiin
so tumhaare sivaa nahiin hotaa

kuun sune arz-e-muztar ai ‘momin’
sanam aaKHir KHudaa nahiin hotaa

(arz-emuzter: expression restlessness)

By Momin Khan Momin

facebooktwittergoogle_plusredditpinterestlinkedinmailby feather

Us se phir kyaa gilaa kare ko.ii

us se phir kyaa gilaa kare ko.ii
jo kahe sun ke kyaa kare ko.ii

ham bhii kyaa kyaa kahen KHudaa jaane
gar hamaarii sunaa kare ko.ii

haa.e vo baaten pyaar kii shab-e-vasl
bhuule kyaa yaad kyaa kare ko.ii

log kyuun puuchhte hain haal meraa
zikr kis baat ka kare ko.ii

dard-e-dil kaa ilaaj ho kis se
yuun masiihaa hu.aa kare ko.ii

bevafaa gar kahuun to kahte hain
kyaa har ik se vafaa kare ko.ii

jaa.e gar jaan to sau hain tadbiiren
jaa.e gar dil to kyaa kare ko.ii

ko.ii apnii KHataa to ho ma.aaluum
uzr kis baat kaa kare ko.ii

dil kaa kuchh haal hii nahiin khultaa
gar maraz ho davaa kare ko.ii

kabhii main ne bhii kuchh kahaa tum se
na suno, kuchh kahaa kare ko.ii

tum se be-rahm par na dil aa.e
aur aa.e to kyaa kare ko.ii

saik.Don baaten kah ke kahte hain
phir hamen kyuun KHafaa kare ko.ii

ko.ii kab tak na de javaab tumhen
chupkaa kab tak sunaa kare ko.ii

shikva us but kaa har kisii se ‘nizaam’
us se kah de KHudaa kare ko.ii

By Nizam Rampuri

facebooktwittergoogle_plusredditpinterestlinkedinmailby feather

Gham-e-hayaat men ko.ii kamii nahiin aa.ii

gham-e-hayaat men ko.ii kamii nahiin aa.ii
nazar-fareb thii terii jamaal-aaraa.ii

(jamaal-aaraa.ii: adorning beauty)

vo daastaan jo teri dil-kashii ne chhe.Dii thii
hazaar baar meri saadgii ne dohraa.ii

fasaane aam sahii mere chashm-e-hairaan ke
tamaashaa bante rahe hain yahaan tamaashaa.ii

teri vafaa teri majburiyaan bajaa lekin
ye sozish-e-gham-e-hijraan ye sard tanhaa.ii

(sozish-e-gham-e-hijraan: burning; fretting pain of sepration)

kisii ke husn-e-tamanna kaa paas hai varna
mujhe KHayaal-e-jahaan hai na KHauf-e-rusvaa.ii

main sochtaa huun zamaane kaa haal kyaa hogaa
agar ye uljhii hu.ii zulf tuu ne suljhaa.ii

kahiin ye apnii mohabbat kii intihaa to nahiin
bahut dinon se teri yaad bhii nahiin aa.ii

By Ahmad Rahi

facebooktwittergoogle_plusredditpinterestlinkedinmailby feather

Dil ke viiraan raaste bhii dekh

dil ke viiraan raaste bhii dekh
aankh kii maar se pare bhii dekh

chaar suu guunjte hain sannaaTe
kabhii sunsaan maqbare bhii dekh

kaanptii hain laven charaaghon kii
raushnii ko qariib se bhii dekh

sozish-e-furqat-e-musalsal se
aanch dete hain qahqahe bhii dekh

band honTon kii naghmagii bhii sun
sotii aankhon ke ratjage bhii dekh

dekhnaa ho agar kamaal apna
aa.iina dekh kar mujhe bhii dekh

By Ahmad Rahi

facebooktwittergoogle_plusredditpinterestlinkedinmailby feather

Din ko rahte jhiil par dariyaa kinaare raat ko

din ko rahte jhiil par dariyaa kinaare raat ko
yaad rakhnaa chaand taaro is hamaarii baat ko

ab kahaan vo mahfilen hain ab kahaan vo ham-nashiin
ab kahaan se laa.en un guzre hu.e lamhaat ko

pa.D chukii hai utnii girhen kuchh samajh aataa nahiin
kaise suljhaa.en bhala uljhe hu.e haalaat ko

kitni tuufaanii thiin raaten jin mein do diivane dil
thapkiyaan dete rahe bha.Dke hu.e jazbaat ko

dard men Duubii hu.ii lai ban ga.ii hai zindagii
bhuul jaate kaash ham ulfat-bhare naghmaat ko

vo ki apne pyaar kii thii bhiigii bhiigii ibtidaa
yaad kar ke ro diyaa dil aaj us barsaat ko

By Ahmad Rahi

facebooktwittergoogle_plusredditpinterestlinkedinmailby feather

Dil ke sunsaan jaziiron kii KHabar laa.egaa

dil ke sunsaan jaziiron kii KHabar laa.egaa
dard pahluu se judaa ho ke kahaan jaa.egaa

kaun hotaa hai kisii kaa shab-e-tanhaa.ii men
gham-e-furqat hii gham-e-ishq ko bahalaa.egaa

chaand ke pahluu men dam saadh ke rotii hai kiran
aaj taaron kaa fusuun KHaak nazar aa.egaa

raag men aag dabii hai gham-e-mahruumiii kii
raakh hokar bhii ye shola hamen sulgaa.egaa

vakt KHamosh hai ruuThe hu.e yaaron kii tarah
kaun lau dete hu.e. zaKHmaon ko sahlaa.egaa

zindagii chal ki zaraa maut ke dam-KHam dekhen
varna ye jazba lahad tak hamen le jaa.egaa

By Ahmad Rahi

facebooktwittergoogle_plusredditpinterestlinkedinmailby feather

Gham Chhupaate Rahe Muskuraate Rahe

Gham Chhupaate Rahe Muskuraate Rahe
Mahafilon Mahafilon Gungunaate Rahe

Aansuon Se Likhi Dil Ki Tahareer Ko
Phool Ki Pattiyon Se Sajaate Rahe

Ghazlen Kumhlaa Gain Nazmen Murjhaa Gain
Geet Sanwalaa Gaye Saaz Chup Ho Gaye

Phir Bhi Ahal-E-Chaman Kitne Khush-Zauq The
Naghma-E-Fasl-E-Gul Gungunaate Rahe

Teri Saanson Ki Khushboo Labon Ki Mahak
Jaane Kaise Hawaayen Udaa Laain Thi

Waqt Ka Har Qadam Bhi Bahaktaa Raha
Zaqt Le Paanw Bhi Dagmagaate Rahe

By Bashir Badr

facebooktwittergoogle_plusredditpinterestlinkedinmailby feather

Ham ishq ke maaron ka..

Ham Ishq Ke Maaron Ka Itanaa Hi Fasana Hai
Rone Ko Nahin Koi Hansne Ko Zamaana Hai

By Jigar Moradabadi

facebooktwittergoogle_plusredditpinterestlinkedinmailby feather