Category Archives: Ashq

Bahana dhundte rahte hain ko.i rone ka

Bahana dhundte rahte hain ko.i rone ka
Hamen ye shauq hai kya astin bhigone ka

Agar palak pe hai moti to ye nahin kaafi
Hunar bhi chahiye alfaz men pirone ka

Jo fasl KHvab ki tayyar hai to ye jaano
Ki vakt aa gaya phir dard ko.i bone ka

Ye zindagi bhi ajab karobar hai ki mujhe
KHushi hai paane ki ko.i na ranj khone ka

Hai paash paash magar phir muskurata hai
Vo chehra jaise ho TuuTe hu.e khilaune ka

By Javved Akhtar

facebooktwittergoogle_plusredditpinterestlinkedinmailby feather

Aksar haseen khwabon ke tuut jaane ke baad

aksar

Aksar haseen khwabon ke tuut jaane ke baad
Ashq bhi bahane padte hei muskurane ke baad

Pashemaan mohabbat ke la-ilaaj zakhm ki tarah
Aawaz dete hai kyun ashq itna rulaane ke baad

(pasheman: ashamed, la-ilaaj: uncurable)

Marhoom ishq se kya wasta abh apne vajuud ka
Kyun chali aati hei yaade yunh tadpane ke baad

(marhoom: dead)

Kitni dushwaar guzarti hei abh ye ghadiyan bhi
Gum hi meethe lagte hei bewafa tarane ke baad

(dushwaar: difficult)

Ye qaydaah aankhon ka bhi kuch toe niraala hei
Khulti hei ye aksar gehri chott khane ke baad

(qaydaah: rule)

Be rahm logg deewano ki tadap samajenge kaise
Kanha kuch sochte hei ye sitam dhane ke baad

Dilon se khelne mein kuch toe ehtiyaat rakhte
Ye sambhalta hi nahi so baar sambhalne ke baad

(ehtiyaat: caution)

By Ritu Roy

facebooktwittergoogle_plusredditpinterestlinkedinmailby feather

YuN hausla dil ne haaraa kab tha

YuN hausla dil ne haaraa kab tha
Sartaan mera sitaaraa kab tha

Laazim tha guzarna zindagi se
Bin zehr piye guzaaraa kab tha

Kuchh pal use aur dekh sakte
AshkoN ko magar gawaaraa kab tha

Hum khud bhi judaayi ka sabab the
Uska hi qusoor saaraa kab tha

Ab aur ke saath hai to kya dukh
Pahle bhi koi hamaaraa kab tha

Ek naam par zakhm khil uthe the
Qaatil ki taraf ishaaraa kab tha

Aaye ho to raushni hui hai!!
Is baam par koi taaraa kab tha

Dekha hua ghar tha par kisi ne
Dulhan ki tarah saNwaaraa kab tha

By Parveen Shakir

facebooktwittergoogle_plusredditpinterestlinkedinmailby feather

Aas Hogi Na Aasraa Hoga

Aas Hogi Na Aasraa Hoga
Aane Waale Dinon Men Kya Hoga

Main Tujhe Bhool Jaaoonga Ik Din
Waqt Sab Kuchh Badal Chukaa Hoga

Naam Ham Ne Likhaa Tha Aankhon Men
Aansuuon Ne Mitaa Diyaa Hoga

Aasamaan Bhar Gaya Parindon Se
Ped Koi Haraa Giraa Hoga

Kitana Dushwaar Thaa Safar Us Kaa
Wo Sar-E-Shaam So Gayaa Hoga

By Bashir Badr

facebooktwittergoogle_plusredditpinterestlinkedinmailby feather

Ham ishq ke maaron ka..

Ham Ishq Ke Maaron Ka Itanaa Hi Fasana Hai
Rone Ko Nahin Koi Hansne Ko Zamaana Hai

By Jigar Moradabadi

facebooktwittergoogle_plusredditpinterestlinkedinmailby feather

Kaam aa sakiin na apnii vafaa.en to kyaa karen

kaam aa sakiin na apnii vafaa.en to kyaa karen
us bevafaa ko bhuul na jaa.en to kyaa karen

mujh ko ye e’tiraaf du.aa.on men hai asar
jaa.en na arsh par jo du.aa.en to kyaa karen

ik din kii baat ho to use bhuul jaa.en ham
naazil hon dil pe rose balaa.en to kyaa karen

zulmat-ba-dosh hai merii du.aa-e-aashiqii
taaron ki mish.ale na churaa.en to kyaa karen

shab bhar to un kii yaad men taare ginaa kiye
taare se din ko bhii nazar aa.en to kyaa karen

ahd-e-tarab kii yaad men royaa kiye bahut
ab muskuraa ke bhuul na jaa.en to kyaa karen

ab jii men hai ki un ko bhulaa kar hii dekh len
vo baar baar yaad jo aa.en to kyaa karen

va.aade ke e’tibaar men taskiin-e-dil to hai
ab phir vahii fareb na khaa.en to kya karen

tark-e-vafaa bhii jurm-e-mohabbat sahii magar
milne lagen vafaa ki sazaa.en to kyaa karen

By Akhtar Shirani

facebooktwittergoogle_plusredditpinterestlinkedinmailby feather

Jab teri yaad ke jugnuu chamke

jab teri yaad ke jugnuu chamke
der tak aankh men aansuu chamke

saKHt taariik hai dil kii duniyaa
aise aalam men agar tuu chamke

ham ne dekhaa sar-e-baazaar-e-vafaa
kabhii motii kabhii aansuu chamke

shart hai shiddat-e-ehsaas-e-jamaal
rang to rang hai KHushbuu chamke

aankh majbuur-e-tamaashaa hai ‘faraz’
ek suurat hai ki har suu chamke

By Ahmed Faraz

facebooktwittergoogle_plusredditpinterestlinkedinmailby feather

Ye jo ghamgeen hokar tujh ko rota dekhtey haiN

Ye jo ghamgeen hokar tujh ko rota dekhtey haiN
YaqeeN kar sab tirey gham ka tamaasha dekhtey haiN

Wahi samjheiNgey kitni aarzi hai ye bulandi
jo Suraj ko nasheboN meiN utarta dekhtey haiN

Ye kaisi be-basi hai ,AabgeenoN ko bana kar
Hawa kay haath phir un ko shikasta dekhtey haiN

Ye Sehra kab talak hassas reh saktey haiN aakhir?
Ke din bhar ik na ik pyasey ko marta dekhtey haiN

Kabhi munkir bhi ho jatey haiN hum is Aaieney kay
Kabhi be-chaargi se apna chehra dekhtey haiN

JawaaN hotey huye dekha tha in aankhoN mein jin ko
unhiN khwaboN ko ab aankhoN meiN marta dekhtey haiN

Kisi makhsoos manzil ka taAqub kartey kartey
Achanak khud ko hum be-samt hota dekhtey haiN

By Khushbir Singh Shaad

facebooktwittergoogle_plusredditpinterestlinkedinmailby feather

Dard hi dard seene mein ubher aaya hoga

image

Dard hi dard seene mein ubher aaya hoga
Jabh usne humei dil se apne bhulaya hoga

Nazer ki sada mein ashqon ko chupaya hoga
Dil tabh uska bhi bahot hi gabhraya hoga

Sard mausam mein ehsaason ki is garmi ne
Meri tarah unhe bhi pal pal jalaaya hoga

Jin ashqon ko aankhon mein sambhala tha
Unhi ashqon ne raat aap ko rulaya hoga

Dard ki ek tees ne sabh ko hila diya hoga
Jabh jazbo ke naqs-e-paa ko mitaya hoga

(naqs-e-paa: footprints)

Ibtisaam se jise sadiyon humne nibhaya
Dard ki inteha hogi jab use dafnaya hoga

(ibtisaam: cheerfulness / smile)

Aankhon se bin baadal barsaat barasti rahi
Dard ki kadakti bijli ne humei daraya hoga

Jabh saari yaadon ko usne apni jalaya hoga
Kitna tadapta khud ko bhi usne paaya hoga

Ishq ki aakhri sada ko sun pachtaya hoga
Jab nazro se mere janaaze ko uthaya hoga

Gam ki ghata si uske chehre pe chayi hogi
Jabh mukadder ne iss kader unhe sataya hoga

Dard hi toe humare rishte se usne paya hoga
Mohabbat ke dino ne unhe kitna rulaya hoga

Ghazab sitam inn sadiyo ne hum pe dhaya he
Har baar mila kar inn dilo ko sataya hoga

Written By Ritu Roy
(Copyright Reserved)

facebooktwittergoogle_plusredditpinterestlinkedinmailby feather

Kuchh na kisii se bole.nge

kuchh na kisii se bole.nge
tanhaa_ii me.n ro le.nge

ham berahabaro.n kaa kyaa
saath kisii ke ho le.nge

[berahabaro.n=pathless travellers]

Khud to hue rusavaa lekin
tere bhed na khole.nge

jiivan zahar bharaa saaGar
kab tak amrit ghole.nge

niind to kyaa aayegii ‘Faraz’
maut aa_ii to so le.nge

By Ahmed Faraz

facebooktwittergoogle_plusredditpinterestlinkedinmailby feather