Category Archives: Ahmad Rahi

Gham-e-hayaat men ko.ii kamii nahiin aa.ii

gham-e-hayaat men ko.ii kamii nahiin aa.ii
nazar-fareb thii terii jamaal-aaraa.ii

(jamaal-aaraa.ii: adorning beauty)

vo daastaan jo teri dil-kashii ne chhe.Dii thii
hazaar baar meri saadgii ne dohraa.ii

fasaane aam sahii mere chashm-e-hairaan ke
tamaashaa bante rahe hain yahaan tamaashaa.ii

teri vafaa teri majburiyaan bajaa lekin
ye sozish-e-gham-e-hijraan ye sard tanhaa.ii

(sozish-e-gham-e-hijraan: burning; fretting pain of sepration)

kisii ke husn-e-tamanna kaa paas hai varna
mujhe KHayaal-e-jahaan hai na KHauf-e-rusvaa.ii

main sochtaa huun zamaane kaa haal kyaa hogaa
agar ye uljhii hu.ii zulf tuu ne suljhaa.ii

kahiin ye apnii mohabbat kii intihaa to nahiin
bahut dinon se teri yaad bhii nahiin aa.ii

By Ahmad Rahi

facebooktwittergoogle_plusredditpinterestlinkedinmailby feather

Dil ke viiraan raaste bhii dekh

dil ke viiraan raaste bhii dekh
aankh kii maar se pare bhii dekh

chaar suu guunjte hain sannaaTe
kabhii sunsaan maqbare bhii dekh

kaanptii hain laven charaaghon kii
raushnii ko qariib se bhii dekh

sozish-e-furqat-e-musalsal se
aanch dete hain qahqahe bhii dekh

band honTon kii naghmagii bhii sun
sotii aankhon ke ratjage bhii dekh

dekhnaa ho agar kamaal apna
aa.iina dekh kar mujhe bhii dekh

By Ahmad Rahi

facebooktwittergoogle_plusredditpinterestlinkedinmailby feather

Din ko rahte jhiil par dariyaa kinaare raat ko

din ko rahte jhiil par dariyaa kinaare raat ko
yaad rakhnaa chaand taaro is hamaarii baat ko

ab kahaan vo mahfilen hain ab kahaan vo ham-nashiin
ab kahaan se laa.en un guzre hu.e lamhaat ko

pa.D chukii hai utnii girhen kuchh samajh aataa nahiin
kaise suljhaa.en bhala uljhe hu.e haalaat ko

kitni tuufaanii thiin raaten jin mein do diivane dil
thapkiyaan dete rahe bha.Dke hu.e jazbaat ko

dard men Duubii hu.ii lai ban ga.ii hai zindagii
bhuul jaate kaash ham ulfat-bhare naghmaat ko

vo ki apne pyaar kii thii bhiigii bhiigii ibtidaa
yaad kar ke ro diyaa dil aaj us barsaat ko

By Ahmad Rahi

facebooktwittergoogle_plusredditpinterestlinkedinmailby feather

Din guzartaa hai kahaan raat kahaan hotii hai

din guzartaa hai kahaan raat kahaan hotii hai
dard ke maaron se ab baat kahaan hotii hai

ek se chehre to hote hain ka.ii duniyaa men
ek sii suurat-e-haalaat kahaan hotii hai

zindagii ke vo kisii mo.D pe gaahe gaahe
mil to jaate hain mulaaqaat kahaan hotii hai

aasmaanon se ko.ii buund nahiin barsegii
jalte sahraa.on men barsaat kahaan hotii hai

yuun to auron kii bahut baaten sunaa.iin un ko
apnii jo baat hai vo baat kahaan hotii hai

jaisii aaghaaz-e-mohabbat men hu.aa kartii hai
vaisii phir shiddat-e-jazbaat kahaan hotii hai

pyaar kii aag banaa detii hai kundan jin ko
un ke zehon men bhalaa zaat kahaan hotiii hai

By Ahmad Rahi

facebooktwittergoogle_plusredditpinterestlinkedinmailby feather

Dil ke sunsaan jaziiron kii KHabar laa.egaa

dil ke sunsaan jaziiron kii KHabar laa.egaa
dard pahluu se judaa ho ke kahaan jaa.egaa

kaun hotaa hai kisii kaa shab-e-tanhaa.ii men
gham-e-furqat hii gham-e-ishq ko bahalaa.egaa

chaand ke pahluu men dam saadh ke rotii hai kiran
aaj taaron kaa fusuun KHaak nazar aa.egaa

raag men aag dabii hai gham-e-mahruumiii kii
raakh hokar bhii ye shola hamen sulgaa.egaa

vakt KHamosh hai ruuThe hu.e yaaron kii tarah
kaun lau dete hu.e. zaKHmaon ko sahlaa.egaa

zindagii chal ki zaraa maut ke dam-KHam dekhen
varna ye jazba lahad tak hamen le jaa.egaa

By Ahmad Rahi

facebooktwittergoogle_plusredditpinterestlinkedinmailby feather

Ab na ka.aba kii tamannaa

ab na ka.aba kii tamannaa na kisii but kii havas
ab to zinda huun kisii markaz-e-insaan ke liye

By Ahmad Rahi

facebooktwittergoogle_plusredditpinterestlinkedinmailby feather

Ko.ii hasrat bhii nahiin ko.ii tamannaa bhii nahiin

ko.ii hasrat bhii nahiin ko.ii tamannaa bhii nahiin
dil vo aansuu jo kisii aankh se chhalkaa bhii nahiin

ruuTh kar baiTh ga.ii himmat-e-dushvaar-pasand
raah men ab ko.ii jaltaa hu.aa sahraa bhii nahiin

aage kuchh log hamen dekh ke hans dete the
ab ye aalam hai ko.ii dekhne vaalaa bhii nahiin

dard vo aag ki bujhtii nahiin jaltii bhii nahiin
yaad vo zaKHm ki bhartaa nahiin ristaa bhii nahiin

baadbaan khol ke baiThe hain safinon vaale
paar utarne ke liye halkaa saa jhonkaa bhii nahiin

By Ahmad Rahi

facebooktwittergoogle_plusredditpinterestlinkedinmailby feather

Kahii.n ye apnii mohabbat..

kahii.n ye apnii mohabbat kii intihaa to nahii.n
bahut dino.n se teri yaad bhii nahii.n aa.ii

By Ahmad Rahi

facebooktwittergoogle_plusredditpinterestlinkedinmailby feather