Latest News

ye dil kabhii na muhabbat me.n kaamayaab huaa

ye dil kabhii na muhabbat me.n kaamayaab huaa
mujhe Kharaab kiyaa, aap bhii Kharaab huaa

ajal me.n, ziist me.n turabat me.n, hashr me.n zaalim
tere sitam ke liye mai.n hii intaKhaab huaa

[ajal=death; ziist=life; turabat=grave]
[hashr=day of judgement; intaKhaab=selected]

nigaah-e-mast ko saaqii kii kaun de ilzaam
meraa nasiib ki rusavaa meraa shabaab huaa

[shabaab=youth]

hamaare ishq kii das-biis ne bhii daad na dii
kisii kaa husn zamaane me.n intaKhaab huaa

fanaa kaa daavaa hazaaro.n ko thaa zamaane me.n
habaab ne mujhe dekhaa to aab-aab huaa

[habaab(hubaab)=bubble; aab=water]

By Bekhud Dehlvi

Read story →    0 comments   

shammaa-e-mazaar thii na koii sogavaar thaa

shammaa-e-mazaar thii na koii sogavaar thaa
tum jis pe ro rahe the vo kisakaa mazaar thaa

ta.Dapuu.Ngaa umr bhar dil-e-marahuum ke liye
kambaKht naamuraad la.Dakapan kaa yaar thaa

jaaduu hai ya tilism tumharii zubaan me.n
tum jhuuTh kah rahe the mujhe aitabaar thaa

kyaa kyaa hamare sajde kii rusavaaiiyaa.N huii.n
naqshe-qadam kisii kaa sare rahaguzaar thaa

By Bekhud Dehlvi

Read story →    0 comments   

na kah saaqii bahaar aane ke din hai.n

na kah saaqii bahaar aane ke din hai.n
jigar ke daaG chhil jaane ke din hai.n

adaa sii Khuub adaa aane ke din hai.n
abhii to duur sharmaane ke din hai.n

garebaa.N Dhuu.NDhate hai.n haath mere
chaman me.n phuul khil jaane ke din hai.n

tumhe.n raaz-e-muhabbat kyaa bataaye.n
tumhare khelane khaane ke din hai.n

ghaTaaye.n uudii uudii kah rahii hai
may-e-a.nguur khi.nchavaane ke din hai.n

By Bekhud Dehlvi

Read story →    1 comments   

may pilaakar aapakaa kyaa jaayegaa

may pilaakar aapakaa kyaa jaayegaa
jaayegaa iimaan jisakaa jaayegaa

dekhakar mujhako vo sharmaa jaayegaa
ye tamaashaa kisase dekhaa jaayegaa

jaauu.N butaKhaane se kyuu.N kaabe ko mai.n
haath se ye bhii Thikaanaa jaayegaa

qatl kii jab usane dii dhamakii mujhe
kah diyaa mai.n ne bhii dekhaa jaayegaa

pii bhii le do ghuu.NT zaahid pii bhii le
maikade se kaun pyaasaa jaayegaa

By Bekhud Dehlvi

Read story →    0 comments   

dard-e-dil me.n kamii na ho jaaye

dard-e-dil me.n kamii na ho jaaye
dostii dushmanii na ho jaaye

tum merii dostii kaa dam na bharo
aasmaa.N mudda_ii na ho jaaye

baiThataa huu.N hameshaa ri.ndo.n me.n
kahii.n zaahid valii na ho jaaye

apane Khuu-e-vafaa se Darataa huu.N
aashiqii ba.ndagii na ho jaaye

By Bekhud Dehlvi

Read story →    0 comments   

dil hai aa_iinaa-e-hairat se do-chaar aaj kii raat

dil hai aa_iinaa-e-hairat se do-chaar aaj kii raat
Gam-e-dauraa.N me.n hai aks-e-Gam-e-yaar aaj kii raat

[hairat = wonder/amazement; Gam-e-dauraa.N = sorrows of life]
[aks-e-Gam-e-yaar = reflection of sorrow of separation]

aatish-e-gul ko daaman se havaa detii hai
diidanii hai ravish-e-mauj-e-bahaar aaj kii raat

[aatish = fire; diidanii = worth seeing; ravish = behaviour; mauj = wave]

aaj kii raat kaa mahamaa.N hai malbuus-e-hariir
is chaman-zaar me.n ugate hai.n sharar aaj kii raat

[mahamaa.N = guest; malabuus = garments; hariir = silk]
[chaman-zaar = garden; sharar = sparks of fire]

mai.n ne farahad kii aaGosh me.n shirii.n dekhii
mai.n ne paravez ko dekhaa sar-e-daar aaj kii raat

[aaGosh = embrace/bosom; sar-e-daar = at the gallows]

jo chaman sarf-e-Khizaa.N hai.n vo bulaate hai.n mujhe
mujhe fursat nahii.n ai jaan-e-bahaar aaj kii raat

[sarf-e-Khizaa.N = in autumn's grasp; fursat = leisure time]

dar-e-yazadaa.N pe bhii jhukatii nahii.n is vaqt jabii.n
mujh se aa.Nkhe.n na la.Daa ??? aaj kii raat

[yazadaa.N = adjective for God (God of piety); jabii.n = forehead]

mashaal-e-sher kaa laayaa huu.N cha.Dhaavaa "Abid"
jagamagaate.n hai.n shahiido.n ke mazaar aaj kii raat

[cha.Dhaavaa = offering; shahiid = martyr; mazaar = tomb/mausoleum]

By Abid Ali 'Abid'

Read story →    0 comments   

chaa.Nd sitaaro.n se kyaa puchhuu.N kab din mer...

chaa.Nd sitaaro.n se kyaa puchhuu.N kab din mere phirate hai.n
vo to bechaare Khud hai.n bhikaarii Dere Dere phirate hai.n

jin galiyo.n me.n ham ne sukh kii sej pe raate.n kaaTii thii.n
un galiyo.n me.n vyaakul hokar saa.Njh savere phirate hai.n

ruup-saruup kii jot jagaanaa is nagarii me.n jokhim hai
chaaro.n khuu.NT baguule ban kar ghor andhere phirate hai.n

jin ke shaam-badan saaye me.n meraa man sustaayaa thaa
ab tak aa.Nkho.n ke aage vo baal ghanere phirate hai.n

ko_ii hame.n bhii ye samajhaa do un par dil kyo.n riijh gayaa
tiikhii chitavan baa.Nkii chhab vaale bahutere phirate hai.n

is nagarii me.n baaG aur ban kii yaaro liilaa nyaarii hai
panchii apane sar pe uThaakar apane basere phirate hai.n

log to daaman sii lete hai.n jaise ho jii lete hai.n
'Abid' ham diivaane hai.n jo baal bikhere phirate hai.n

By Abid Ali 'Abid'

Read story →    0 comments   

Dard..

Yunhi chaader taan ke kabhi kabhi dard so jaata hei
Lagta hei ki jaise kuch pal ko har gum kho jaata hei
Phir achanak shaam ke gulabi hote hi pehar badalta hei
Aur vahi soya huva dard jaise jaag ke khada ho jaata hei

- Ritu Roy

Read story →    0 comments   

Kabhi kisi khubsurat shaam..

Kabhi kisi khubsurat shaam ko aisse hum ek dusre mei kho jaaye
Tere seene pe mera sar ho aur tere aaghosh mei mere armaan so jaaye
Na subah ki koi fikr ho na raat ke andhero ka hosh reh paaye Jaana
Kuch iss tarah se hum ek dusre ki panaahon mein madhosh ho jaaye

- Ritu Roy

Read story →    0 comments   

Tere Bin..

Tere bin, E Jaana lamhe udaas lagne lagte hei
Palko ke chilman pe rakhe ashq tadapne lagte hei
Tuje dekhne ki aas mei jaise hi nazer uthti hei...
Teri pyaas ke moti aankhon se bikharne lagte hei

- Ritu Roy

Read story →    0 comments   

Meri Mohabbat..

Meri mohabbat E Jaana, gar qaid hei toe tuje aazad karti hu
Gar mujhse bichad kar tu aabad rahe ja tuje aabaad karti hu
Gilla tujhse nahi takdeer ke khel ke aage mein tutt jaati hu
Tere hathon se sajaaye huve gulshan-e-dil ko barbaad karti hu

- Ritu Roy

Read story →    0 comments   

Khwaab, minnat, dard aur khushbu..

Khwaab, minnat, dard aur khushbu sabh ek se lagte hei
Jin ko nai dekha duniya mei vohi logg sabh nek se lagte hei

- Ritu Roy

Read story →    2 comments   

khushiyon ke daaman ka

khushiyon ke daaman ka hasta huva phool murjha gaya
jaate jaate vo umeed ka aakhri diya bhi bujha gaya
meri aankh se behte huve ashq kehte the teri kahani
wafa faroshi se voh phir ye samunder bhi sukha gaya

- Ritu Roy

Read story →    0 comments   

Zindagi aanshuon ke haath ka khilona hei

Zindagi aanshuon ke haath ka khilona hei
Jo paaya hei yanha vo yanhi par khona hei
Tu kis baat ka gum karta hei eei mere dil
Jo apna hi nahi uske liye phir kyun rona hei

- Ritu Roy

Read story →    0 comments   

Dil Ko Todne Keliye ..

View attachment: kyun.png

Dil ko todne keliye nayi umeed deta hei kyun
Jo paraya hi karna hei toe apna kehta hei kyun

Mei, meri tanhaai aur chaand raaton ka mera safar
Tu humsafar nahi toe saath mere rehta hei kyun

Meri sukhi aankhon ko samunder mein dubaane wale
Jo ruuk nahi sakta hei toe phir thehrta hei kyun

Ajnabi hei itni meri jaat jo tujhse toe bata de
Naam mera tu har subah uth ke phir leta hei kyun

Mere sikwe sikayat sabh kuch tujh se hei wa-basta
Jo ishq hi nahi toe meri aankhon se behta hei kyun

~~~~~~~~~~~~~~~~~~~~~~~~~~~~~~~~~~~~~~
Written By Ritu Roy - Copyright Reserved
Written on 13th May 2012 - 10:15 Sunday
~~~~~~~~~~~~~~~~~~~~~~~~~~~~~~~~~~~~~~

Read story →    8 comments